Diyarname
Lêkolîner Beyhanî Şahîn ev bi dehan salan e li ser dixebite û di encama vê xebatê de “Avesta 1: Gathayên Zarathustra” çap kir. Pirtûk ji Weşanxaneya Nayê derket.
Îndo-cermenîst, îndo-îranolog, avestolog û kurdolog Beyhanî Şahîn ev demek dirêj e li ser kurdî dixebite. Di nav xebata wî de lêkolîna li ser gathayan jî hebû ku niha ew wekî pirtûk derket. Ev xebat niha wekî cilda yekemîn hatiye çapkirin û li gor agahiya weşanxaneyê dê 12 cild bê çapkirin.
PIRTÛKÊN PÎROZ JÊ SÛDE GIRTINE
Li gor nivîskar Gatha û Avesta bingeha çanda kurdan a herî kevn pêk tînin; ew kaniya axa Kurdistanê û zimanê kurdî ne, bingeha baweriya kurdên elewî, êzdî û yarsanan in. Bandora Avesta û Zarathushtra ya li Kurdistan, Îran, Rojhilata Navîn û Asyaya Dûr ji sînorên hemî tarîfan derbas dibe. Ew dibêje hemû dînên mezin ên cîhanê wekî Tewrat, Încîl û Quran di bin bandora Avesta û Zarathushtrayê de mane, jê bê sînor îstîfade kirine, xwe pê ava kirine. Loma jî ew zêde qîmetê dide vê xebatê.
DIYARÎ EVDALÊ ZEYNIKÊ KIRIN
Ev pirtûk diyarî Evdalê Zeynikê hatiye kirin. Weşanxaneyê li ser sedema vê yekê wisa gotiye, “Em dil dikin her cîldekê diyarî dengbêjekî/e din yê/a kurd bikin. Li gorî ragihandina Beyhanî Şahîn: Jixwe Zarathushtra bi xwe ‘Manthra’yê (dengbêjê) destpêkê bûye loma jî em bi hêvî ne ku ew pireya poetîk a destpêkê dîsa bikare bigihîje xwediyên xwe yên îro, bigihîje dengbêjan.”
Îdîaya vê xebatê ew e ku cara yekem bi vê xebatê ewê li Kurdistanê bingeha “Avestolojiyê” li ser bingeheke zimanasiyî bi awayekî akademîk were danîn. Li ser vê lêkolîner Şahîn jî wisa dibêje: “Tevî ku li Kurdistanê çend wergerên Avesta û Gathayan hatine çap kirin jî, tu muhteviyeke wan a zmannasiyê û akademîk tune. Ew werger wekî hewldanên ezoterîk in.”
DESTNIVÎSÊN GATHAYAN
Cilda yekem ji 3 beşan pêk tê ku ew jî ev in:
1. Destnivîsên orîjîn yên Gatha’yan, ku di sala 1323’yan de hatine nivîsîn ango kopye kirin, wekî wêne di cîlda yekem de yek bi yek hatine bi cî kirin.
2. Di beşa duyem de vê carê tevayiya Gatha’yan bi fonda Avestî hatiye nivîsîn.
3. Di beşa sêyem de hemî Gatha’yên Zarathushtra yek bi yek hatine trenskrîpte kirin, bi tevî nîşeyên zimanî yên girîng.
Weşanxaneya Na dibêje ku hemû kesên bixwazin li ser Avestayê lêkolînê bikin dê sûdeyeke mezin ji vê xebatê bigirin.
Lêkolîner Beyhanî Şahîn berî vê pirtûkên bi navê “Nîvîsarên Farisiya Kevin yên Dariyus -1” û “Bêjenasiya Zimanê Kurdî” jî çap kiribûn.
