Diyarname /
Pirtûkek nû bi navê “Hunermend û Dengbêjên Jin” ji Weşanxaneya Na derket. Di pirtûka ku Narîn Omer Seyfudîn amade kiriye de portreyên hunermend û dengbêjên jin ên kurd hene.
Gula Ermenî, Elmas Xan, Meryem Xan, Leyla Bedirxan, Belga Qado, Sûska Simo, Banû Şêrwanî, Gulbihar Can, Fatima Îsa, Fewziye Mihemed, Eyşeşan Afrênera Narvînê, Eslîka Qadir, Îran Xanim, Şehîn Talebanî, Merziya Ferîqî, Tara Caf, Gazîn Xan, Gulistan Perwer… Em qala hunermend û dengbêjên jin ên kurd dikin. Van heta niha gelek ked dane huner û muzîka kurdî. Hin ji wan canê xwe ji dest dane, hin hê dijîn. Niha portreya wan di pirtûkek de hate amadekirin û çapkirin. Pirtûk ji aliyê Narîn Omer Seyfudîn ve hatiye amadekirin. Ew li ser amadekirina pirtûkê dibêje, “Bi salan û geryaneke dirêj min ev agahiyan li ser hin jinên kurd kom kirin û di vê pirtûkê de diweşînim” û van yekan lê zêde dike, “Amadekirin hêsan nebû. Ji ber ku jêder û çavkanî li ser wan pir kêm in û yên hene jî ne cihê teqezkirin û baweriyê ne. Ji ber vê yekê demek direj û lîkolîneke kûr dihate xwestin. Wekî nimûne: Li ser jiyan û dengbêjiya “Meryem Xanê” gelek çîrok û çîvanok hene û ew ji hev cudawaz in. Min hemî li ber hev danîn û agahiyên herî balkêş hilbijartin.”
Di pirtûkê de rêzkirina xelekan û navê hunermend/dengbêjan li gor temenê wan hatiye rêzkirin.
Narîn Omer Seyfudîn kî ye?
Narîn Omer Seyfudîn li bajarê Dêrikê li rojavayê Kurdistan hatiye dinê. Wê li Dêrikê xwendiye û paşê çûye Zanîngeha Dîmeşqê ya Sûriyê û di sala 1995’an de bawernameya bilind wergirtiye
Seyfudîn ku karê mamostetî kiriye heta niha gelek pirtûkên wê derketine û hin xelat jî girtine. Ew niha li Almanyayê dijî.
– Hunermend û Dengbêjên Jin / Narîn Omer Seyfudîn / Weşanên Na / Portre / 92 rûpel / 2023